“Çairi nuk guxon të mbetet komuna më e ndotur në Shkup. Asnjë fëmijë nuk duhet të luajë në parqe të mbushura me mbeturina, asnjë nënë nuk duhet ta çojë fëmijën e saj nëpër rrugë të mbushura me plehra. Mjaft më me improvizime dhe punësime partiake,” deklaroi Osmani në konferencën e sotme për shtyp. Ai theksoi se aktualisht në komunë janë të angazhuar rreth 75 persona me kontratë për higjienë, por kontributi i tyre është simbolik, sepse shumica prej tyre përdoren për qëllime partiake, e jo për punë të vërtetë në terren.
Për një ndryshim tërësor dhe afatgjatë, Osmani prezantoi konceptin e tij për një Çair më të pastër. “Formimi i një ndërmarrjeje të re komunale ‘Për një Çair të pastër’, sipas shembullit të Komunës Qendër. Punësimi i 120 higjienistëve me sistem pune të qartë dhe të kontrolluar. Blerja e mekanizimit modern – kamionë, makina për larjen e rrugëve, pajisje për grumbullimin e mbeturinave dhe shërbim dimëror”, tha Osmani.
Higjiena, sipas tij, nuk është vetëm estetikë, ajo është çështje shëndeti dhe respekti për qytetarët. “Unë premtoj: kjo pamje do të ndryshojë”, theksoi Osmani, duke shtuar se do të vendoset analizë e rregullt e cilësisë së shërbimit, e bazuar në reagimet e qytetarëve dhe monitorim të vazhdueshëm në terren.
