Futbollisti portugez Joao Felix ka kompletuar transferimin nga Chelsea te Al-Nassr në Arabinë Saudite.
Dëmshpërblimi fillestar për këtë lëvizje kap vlerën e 30 milionë eurove, por me bonuse shuma mund të arrijë deri në 50 milionë euro.
Felix ka nënshkruar kontratë dyvjeçare me skuadrën saudite, ku aktivizohet edhe Cristiano Ronaldo. Pikërisht Ronaldo ka luajtur rol kyç në bindjen e Felixit për t’u transferuar në Arabi, duke bërë që ai të heqë dorë nga kthimi në Portugali.
Mesfushori ofanziv, i cili dikur vlerësohej si një prej talenteve më premtuese, ka luajtur më parë për Benficën, Atletico Madridin, Chelsean, Barcelonën dhe së fundmi për Milanin. Megjithatë, në moshën 25-vjeçare, ai ende nuk ka arritur nivelin që i parashikohej. Tani, karrierën do ta vazhdojë në Ligën Saudite.
