Një trend i jashtëzakonshëm duket se po bëhet veçanërisht i popullarizuar në mesin e çifteve mbi 50 vjeç që vendosin t’i japin fund martesave të tyre të gjata.
Ky fenomen, i referuar shpesh si “divorci gri”, ka parë një rritje të ndjeshme, me shkallën e divorcit për të rriturit e moshës 50 vjeç e lart më shumë se dyfishuar midis 1990 dhe 2010.
Një studim i vitit 2022 i botuar në “The Journals of Gerontology” zbuloi se 36% e të divorcuarve në SHBA ishin 50 vjeç ose më të vjetër. Susan Brown, një profesoreshë sociologjie në Universitetin Shtetëror të Bowling Green, ndihmoi në krijimin e termit “divorci gri”.
“Gratë duket se kanë pak më shumë gjasa për të nisur procedurat e divorcit”, tha Brown.
Artistja Edith Heyck i përket atyre që zgjodhën të divorcoheshin pas të 50-tave.
“Unë jam një 70-vjeçare në kërkim të një 60-vjeçari,” tha ajo për Nightline. “Kam një djalë që stërvitem. Unë kam një partner skijimi. Po jetoj momentin më të gjallë të jetës sime. Diçka që as nuk e kisha ëndërruar”.
Heyck u rrit në një familje tradicionale, por deklaroi se përvojat e saj të jetës janë larg të qenit konvencionale.
“Nuk kam menduar kurrë për divorcin dhe nuk kam njohur askënd që ishte divorcuar. Ne gratë zbuluam një ndjenjë të lirisë sonë, në mënyrë që të mos ishim të detyruar të qëndronim në një martesë ose një marrëdhënie, si nëna ime, të themi, e cila nuk ishte në gjendje të siguronte as jetesën”.
Ajo deklaroi se po ‘lulëzon’ si beqare, duke marrë mundësi të reja karriere, të tilla si menaxhimi i një parku lokal pranë shtëpisë së saj dhe se po provon hobi të reja, siç është komedia “stand-up”.
Ashtu si Heyck, Laura Stassi po e shijon beqarinë pas divorcit.
64-vjeçarja ishte e martuar për gati 30 vjet, derisa burri i saj i atëhershëm i kërkoi divorcin. Në fillim, ajo tha se ndjehej sikur kishte humbur identitetin e saj, por rifitoi pavarësinë e saj pas divorcit.
Ajo tani po drejton një podcast të quajtur “Dating while Grey”, i cili fokusohet në marrëdhëniet dhe skenën e takimeve për të rriturit më të moshuar.
“Nuk dua t’ia hedh fajin për gjithçka ish-burrit tim”, tha Stassi. “Unë në shumë mënyra i jam mirënjohëse që ai më kërkoi divorcin.”
Trendi është gjithashtu i njohur në Hollywood
Divorciet gri nuk janë vetëm për njerëzit e zakonshëm, pasi numri i tyre në rritje ka ngjallur gjithashtu interes ku ato janë paraqitur në filma të tillë si “First Wives Club” i vitit 1996 – me Bette Midler, Goldie Hawn dhe Diane Keaton – dhe It’s Complicated i 2009-ës – me Meryl Streep, Steve Martin dhe Alec Baldwin;
Të dhënat e sondazhit tregojnë se shkalla e divorcit në mesin e amerikanëve mbi moshën 50 vjeç u dyfishua në kohën midis shfaqjes së këtyre dy filmave.
Disa të famshëm kanë befasuar gjithashtu botën me njoftimet e tyre për ndarje. Ky trend përfshin aktore të shquara si Meryl Streep, yllin e “X-Men” Hugh Jackman dhe Leah Remini. Përveç artistëve, të njëjtin trend ndoqën edhe sipërmarrësit miliarderë, si Bill dhe Melinda Gates.
