Presidenti i Turqisë, Recep Tayyip Erdoğan, në një program trajnimi për të drejtat e njeriut të mbajtur në Ankara të hënën tërhoqi vëmendjen ndaj problemeve në rritje dhe presionit në sistemin ndërkombëtar, veçanërisht në mes të sulmeve të vazhdueshme të Izraelit në Gaza.
“Politika botërore po kalon një nga kthesat e saj më të mprehta. Ka një mungesë serioze lidershipi në sistemin ndërkombëtar dhe ne po përballemi me një humbje të moralit dhe ndërgjegjes,” u shpreh Erdoğan në fjalimin e tij.
“Me krizën e Gazës, sistemi global ka falimentuar”, tha presidenti turk.
Ai shtoi se përballë shtypjes në Gaza, “që normalisht duhet të zgjojë njerëzimin, Këshilli i Sigurimit i OKB-së qëndron i heshtur”.
Duke e krahasuar kryeministrin izraelit Benjamin Netanyahu me Adolf Hitlerin, Erdoğan tha se ata që “duartrokasin” gënjeshtrat e tij “nuk do të jenë në gjendje të lajnë kurrë njollat e errëta në duart e tyre për pjesën tjetër të jetës së tyre”.
Autorët e gjenocidit “nuk duhet të jenë në podiumet e dhomave legjislative”, por në sallat e gjyqit ku do të japin llogari për krimet e tyre, vijoi ai.
Më tej, ai theksoi se një “fashizëm digjital që nuk mund të tolerojë as foto të dëshmorëve palestinezë dhe i ndalon ata menjëherë, por e shet këtë si liri”, duke shtuar se “Platformat e mediave sociale tregojnë kujdes të madh në ndjekjen e rregullave në ShBA dhe Evropë, por qëllimisht refuzojnë të kenë të njëjtin kujdes kur bëhet fjalë për Turqinë.”
