Inspektorati Shtetëror për Vetëqeverisje Lokale ka shënuar sot një hap domethënës në drejtim të fuqizimit të kapaciteteve të veta, duke bërë të ditur punësimin e tetë punonjësve të rinj në këtë institucion.
Lajmin e bëri publik drejtori i Inspektoratit, Haqim Ramadani, i cili theksoi se ky zhvillim nuk është thjesht zgjerim i stafit, por një hap drejt ngritjes së një administrate më efikase dhe më pranë qytetarëve.
“Kemi arritur të zgjerojmë ekipin tonë me 8 punonjës të rinj. Kjo është një arritje që pasuron kapacitetet profesionale dhe forcon efikasitetin, transparencën dhe cilësinë e punës sonë”, u shpreh Ramadani.
Ai shtoi se punësimet vijnë pas një periudhe angazhimi të vazhdueshëm dhe përpjekjesh të koordinuara brenda institucionit dhe se të sapoemëruarit do të kenë rol të rëndësishëm në realizimin e misionit institucional të Inspektoratit.
“Ky është një hap i rëndësishëm drejt ndërtimit të një administrate më funksionale dhe më të orientuar nga nevojat e qytetarëve”, deklaroi Ramadani, duke uruar mirëseardhjen dhe suksesin e punonjësve të rinj në detyrat që i presin.
